Nieuwsbericht

20mrt Viefde Dag van de Grunneger toal groot succes

Optreden Marlene Bakker in de meziekkroug Foto: Pjotr Wiese Optreden Marlene Bakker in de meziekkroug Foto: Pjotr Wiese

Deur Eddy de Jonge

De viefde Dag van de Grunneger Toal, hold op 15 meert in Stad, in t gebaauw van de Grunneger Archieven, was dit joar n ongeleuflek succes. n Bult mensen kwam der op oaf. Zo roem doezend lu binnen der teld. Ze kwammen veur n ofwogen programma mit veul meziek, flitslezens, broescursussen, theoater en poezie. En vanzulf veur de traditionale ‘toalmaarkt’. Van 11 tot 4 uur n ontspannen sfeer woar elk en ain mit belangstellen veur t Grunnegers mekoar tegen kon kommen. n Hoogtepunt van de Dag was t uutraaiken van de K. ter Laanpries aan Hans van der Lijke deur gedeputeerde Wilpstra.

Programmeur Henk Scholte haar n degelek en n kwalitatief programma bedocht. Goie  meziek van t mement en n keur van de beste Grunneger dichters. Dit programma trok lu van alle leeftieden en uut alle houken van de provincie. Opvalend binnen de jonge muzikanten en schrievers dij t Grunnegers inkeld gebruken veur heur kunst en nait meer om in te proaten.

Dizze Dag was n veurbeeld van hou of t mot. Op de ervoaren van de veurege joaren staait der nou steveg fundament woar de kommende joaren op deurbaauwd kin worden.
t Zel nog n hail kripsie worden veur de lu van de organisoatsie om volgend joar weer zo’n succesvol gehaail te bedenken. Mor zie hebben n joar om der over noa te denken. En mien advies zel wezen: nou alvast begunnen mit t programma en betrek n bult minsen der bie.

Foto's Dag van de Grunneger toal 2014

 

Terug naar nieuwsoverzicht