Nieuwsbericht

09jun Kor Dijkstra uut tied kommen

Börgmeester Kor Dijkstra van de gemainte Grodegast is dinsdagoavend 7 juni op 62-joarege leeftied uut tied kommen.
Dijkstra wuir òflopen vrijdag mit n longontsteken votdoalek opnomen in t Martinizaikenhuus in Stad. Bie t onderzuik bleek dat e ook nog wat meer onder leden har en dou hebben ze hom sunt zotterdag in coma holden. Op dinsdagoavend is e in zien sloap overleden.
Noast zien langstzittende börgmeesterschop was e slim aktief in de wereld van de Grunneger toal. Hai was joarenlaank veurzitter van stichten Grunneger Toal en loater trad e tou tot t bestuur van het Huis van de Groninger Cultuur. Ook was e joarenlaank actief bestuurslid van de Ludger stichten. Hai muik zuk op allerhaande menaaiern staark veur t behold van de Grunneger Toal op n hail plezaaierge menaaier en was n bekwoam bestuurder. Het Huis van de Groninger Cultuur bedankt Dijkstra veur zien inzet. Wie hebben mit nkaander n vrund mit n groot haart veur de goie zoak verloren.

Foto: Henk Scholte.

Terug naar nieuwsoverzicht