Pergram 2017

12:20 uur 13:00 uur Meziek - Marlene Bakker

Marlene Bakker is n opvallende verschienen ien t Grunnegstoaleg circuit. Jong en vraauw en begiftigd mit n prachtege stem. Heur vertolkens van Ede Staal, vertoalens van nummers van onder meer Tina Dico en Adèle en heur aigen waark bezörgen heur n hail aigen stee binnen de dialectpop en de Hollandse muziekscene. Doarnevens debuteerde zai vleden joar verrazzend as actrice noast Roger Goudsmit ien de Grunneger muziektheoaterveurstellen ‘Hoes en Heerd’. Mit optredens zoas tiedens de Nacht van Noord het Marlene al beheurlieke bekendhaid moakt. Aalgedureg is ze te heuren op Radio Noord mit ‘Wondern van mien stee’, ‘Golven’ en de singles ‘Heufd as Helm en ‘Loat Grunnen nait zakken’. Ook t duet Òfschaaid dat zai soamen mit Edwin Jongedijk zingt is nait bezied bleven. Dizze single kwam tot n nummer 1 notering ien de Noord 9 van RTV Noord.

Op dit moment wordt der waarkt aan n Grunnegstoaleg debuutalbum dat produceerd wordt deur Bernard Gepken en ien loop van 2017 oetkommen zel. Op t album speulen nait de minste muzikanten mit: drummer Nicky Hustinx (Eefje de Visser, Sofie Letitre en Weval), toetsenist Arjen de Bock (Maaike Ouboter en Bewilder) en bassist Reyer Zwart (Anne Soldaat, Jacqueline Govaert, Alex Roeka en Freek de Jonge). Doarnoast zel Marlene vantjoar touren goan mit ‘Hoes en Heerd’, ‘Das Kabarett’ en het Grunnegstoaleg Volksverhoalen Project ‘Spinbarg’. Al mit al dus n veulbelovend joar!

Op Dag van de Grunneger Toal zel Marlene onder begelaaiden van Bernard Gepken en Arjen de Bock n veurproefke heuren loaten van heur aankommende debuutalbum.

www.marlenebakker.nl

Terug naar programma