Gedichtenbundel over de liefde: Dast doe dat ik

Tiedens de Dag van de Grunneger toal wordt de bloumlezen 'Dast doe dat ik' prezenteerd. De bundel bevat 90 Grunnegstoalege gedichten over de laifde, n selectie Grunneger poëzie dij òflopen datteg joar publiceerd wer ien bundels, bloumlezens en ale joargangen van tiedschrift Krödde. n Aantal  dichters het specioal veur de bundel n nij gedicht schreven. De soamenstellers van de bundel - Aly Freije, Tonko Ufkes en Nina Werkman - waren aangenoam verrast over de grote houveulhaid laifdespoëzie woar zai oet kaizen konden. Noa n kritische selectie  mag t rezeltoat der wezen. Dast doe dat ik is n prachtege bloumlezen worden, n woar Grunneger statement over 'de laifde'.

Ien de bundel staait t thema laifde tiedens verschillende levensfoasen en omstandegheden centroal. Dichter Hanny Diemer schrift: 'Bladstil lag k onder zien smokjes/dou k rondomrond besnuvveld wör./En hail verzichteg knuvvelde/ik zaacht flewail en fluusterde:/ik vin die mooi '. n Fragment oet t gedicht Rechteraarm van Jan Bos: 'Oavendhuver overvaalt ons leeftied./Stram stoan wie op, din vragt zai steun/om mien rechteraarm en soamen/schoeveln wie stoareg t twijduustern ien.'  Dat thrillerschriever Lupko Ellen ook gedichten schrift is minder bekend: 'ze draait en zucht/de knijen licht gebogen/en aait de rimpel boven mien ogen'. Fieke Gosselaar is onderhand n bekende dichteres: 'Mit störm in dien ogen/kikst mie aan, windkracht 10./Doe wilst mien wervelwind./Ik geef die n zwoel briesje.' Jan Siebo Uffen, al sikkom viefteg joar schriever van Grunnegstoalege verhoalen en gedichten, ontbrekt vanzulf nait ien dizze bloumlezen: 'n Jonge man, n jonge vraauw,/ze zaaien bloumkes doar ooit wotter was/en nou – doar lèst de zee nog was,/is laifdesgras.'

Der wordt wel ais zegd dat Grunnegers heur stoer uten over de laifde, mor de bundel Dast doe dat ik bewiest t tegendail. Ien Grunnen beleeft men de laifde zoas elkenain op de wereld de laifde beleeft. De gedichten binnen teder, erotisch, vol verlangen, mor ook wrang en ironisch; de pien van t òfschaaid. Dast doe dat ik is n nije stoalkoart van de Grunneger lyriek van òflopen datteg joar en vörmt n schiere aanvullen op de leste, oetgebraaide bloumlezen De 100 mooiste Groningse gedichten, oetgeven ien 2006.De bundel wordt oetgeven deur t Huis van de Groninger Cultuur en is allinneg te verkriegen op de Dag van de Grunneger Toal ien de Groninger Archieven ien stad Grunnen. Haildaal vergees, zolang de veurroad strekt.