Bé Kuipers

Foto: Jan Glas Foto: Jan Glas

Bé Kuipers (1946) woonde tot zien 20e joar ien Middelsom, ging noa loagere schoul noar LTS ien Stad en loader noar UTS. Ien oavenduren studaaierde Bé architectuur, ruimtelijke ordening en stedebouw. Eerst het e kort waarkt as timmerman, dou n joar op t kantoor Gemaintewaarken ien Middelsom en doarnoa laangste tied bie PEB ien Stad, dat loader EGD haitte en nog loader EDON. Hai is as taikenoar ien Stad begonnen, doarnoa projectlaaider ien Zwolle en hai aindegde as hoesvestingsconsulent bie Essent ien Waalre.

Ien tachteger joaren het e ien zien vrije tied de oplaaiden MO Nederlands doan. Touglieks waarkte hai freelance bie t Bouwcentrum ien Rödderdam veur t schrieven en vertoalen van boetenlandse artikeln over baauwkunde en architectuur en was e redacteur van bedriefs- en personeelsbloaden. Doarnaast schreef e columns veur de ienterne website van Essent. Van dij colums is n boukje oetgeven met n seleksie der van, Vastgoed en andere verhalen (2001).

Hai woonde tien joar ien Stad en vanof 1976 ien Sauwerd. Eerst as stadse forens, mor op n duur weer as n Grunneger autochtoon. Ien negenteger joaren ging Bé op zuik noar zien worrels en begunde ien zien moudertoal te schrieven. Zien verhoalen stoan regelmoatig ien Krödde, Toal en Taiken en Kreuze. Ien 1998 schreef Bé t joarlekse begunstigersbouk van Stichting t Grunneger Bouk, Òfzain en ienlevern. Ale moanden het e ook n verhoal ien t Grunnegers ien t Contactblad van Oadörp, Sauwerd en Wetsen. Zien verhoalen bennen n mix van dingen dij e om hom tou zigt gebeuren, wat e zulf mitmoakt en zien fantezie. Geregeld leest Be zien verhoalen ook veur.