Home > Nieuws Overview
BezoekadresCascadeplein 4
9700 RM Groningen
Openingstijden
maandag t/m donderdag:
09.00-16.00 uur Postadres
Postbus 300 40
9700 RM Groningen
Tel 1: 050 - 599 20 60
Tel 2: 050 - 599 20 61
Contact opnemen
Webloug
Moi,
Wie willen joe ook via dizze weg weer ais op de höchte stellen van n nij initiatief veur de Grunneger Toal: 'Webloug'. Veur aal dij organisoatsies en aander lu dij doar de slinger aan het, hebben wie van t Huis van de Groninger Cultuur n stee uutdokterd doar elkenain dij aan loop is mit evenementen, lezens, optredens, theoater en zo wieder in en rondom t Grunnegers zien berichtgevens en agendapunten kwiet kin.
Hou melden je n aktiviteit/optreden aan?
Melden kin via knop 'aktiviteit melden' op Webloug zulf, of deur n mail te sturen noar: webloug@gmail.com
Beschrief ien de mail wat der te doun is. Doatem, tied, stee, adres, tillefoonnummer, email, tougang. Geern n foto derbie (rechtenvrij) en noam van fotogroaf as dat bekend is. Op recherkaant van Webloug komt joen aanmelden (as link) bie de ‘aktiviteiten’. Noam zegt t al: dat kin allain mor as der linked worden kin noar n webstee of n aankondegen dij al aargens op internet staait. Summegen aktiviteiten worden even specioal oetlicht. Tegen tied dat t zover is, kin der n bericht over op Weblougs hoofdpagina te lezen wezen. Doar is gain gerantsie veur, hou beder ie de informoatsie aanlevern hou groder de kans dat t ploatst wordt. Foto’s binnen belangriek veur aantrekkelkhaid van t bericht. Webloug het zulf n veurroad foto’s dij aal mor groder worden zel. t Het nait veul zin om besloten aktiviteiten aan te kondegen. Webloug kin wel ais aandacht besteden aan groepen, initiatieven, Grunneger leesclubkes etc.
Berichten op Webloug zellen ook op Twitter en Facebook meld worden. Ie kinnen Webloug volgen op Twitter en Facebook.
De links noar organizoatsies, meziek, schrieverij en theoater binnen al n beetje verzoameld. Willen ie derbie stoan, geef dat deur. Weer is belangriek dat je n stee op internet hemmen om noar te linken. Veur schrievers mit n blog of website is t belangriek veur Webloug dat (merendail van) teksten ien t Grunnegs schreven binnen. Zingen je ien Grunnegs, mor is joen website ien t Nederlands din is dat gain bezwoar, n meertoalege website veur muzikanten is natuurlek t schierste.
Webloug zel pebaaiern n aktiviteit minstens n moand van te veuren te melden. t Is eerste tied even aankieken hou t lopen gaait.
Webloug op facebouk:
Dizze webstee staait ook in verbinden mit facebouk, woar ie ook bevrund mit worden kinnen. Wat t directe nijs aanbelangt en t sloagen doarvan hangt aalmoal van onze aigen inzet of. Elkenain dij denkt dat e over t Grunnegs wat te melden het, kin zuk op dizze facebouk-stee ook nog aans utern. Webloug op facebouk is bedould as n aalgemain forum veur en over Grunnen in t Grunnegs. Grunnegs is vandoag de dag nog n springleventege toal en is aalgedureg in bewegen. Hou t der bie joe aalmoal tougaait wilve geern van ale kaanten op dizze stee vernemen.
Ik zol zeggen loat joe nait nuigen en wees nait ainkenneg om hier of en tou n biedroage aan te levern.
n Forum van Grunnegers deur Grunnegers
n Forum van Grunnegers deur Grunnegers en ook nait-Grunnegers moutve hierbie nait vergeten. Veur elkenain dij n waarm haart veur Grunneger toal het is der hier n stee om van gedachten te wizzeln. Ik wait dat der lu binnen dij wat kopschaauw binnen om wat van heur aigens heuren te loaten. Lu wees veuraal nait benaauwd om mit joen sproakwotter veur dokter te kommen. Loat joen toalgeremdhaid ais voaren. t Gaait ons echt nait om n vörm van puristisch toalverbetern, mor meer om t spul wat aan te joagen. Gain mins is volmoakt en vlekkeloos... in zien toal. Zuik t din veuraal in joen aigen beleven en richten en ie zellen maank joen oren joen pazzieve Grunneger toal vannijs ontdekken. Ie zellen din gaauwachteg maarken dat je veul meer waiten en denken dan je zulf ooit opbedocht haren. t Toalmesientje mout vanzulf wel deur joezulf opstart worden. Ie ontdekken din in joezulf dat je ook n lutje Columbus wezen kinnen, want riekdom van toal ligt zomor bie joe aan t veurdeure. Baang wezen om wat verkeerds te zeggen of te schrieven moutve votdoalek ontzenen en toalvoutangels en klemmen loatve in dit forum veur wat t is. Ik zol zeggen 'aan t waark,' wie hebben t ja nog aan tied om der mit n kaander wat moois van te moaken. En kiek veuraal noar wat toukomst brengt, want wie hebben al veuls te veul weeromkeken noar wat west het. Blief bie de tied! en veur regelmoateg nijs uut ons Grunneger literair toaltoentje kinnen je boetendes ook nog terechde op webloug.blogspot.com
Henk Scholte consulent Huis van de Groninger Cultuur