Home > Nieuws Overview
BezoekadresCascadeplein 4
9700 RM Groningen
Openingstijden
maandag t/m donderdag:
09.00-16.00 uur Postadres
Postbus 300 40
9700 RM Groningen
Tel 1: 050 - 599 20 60
Tel 2: 050 - 599 20 61
Contact opnemen
Dag van de Grunneger toal zotterdag 17 meert
Dag van de Grunneger toal zotterdag 17 meert mit n òfwizzelnd pergram veur jong en old
Op zotterdag 17 meert wer veur daarde moal de Dag van de Grunneger toal holden. Organizoatsie was in handen van t Huis van de Groninger Cultuur, Stichting Grunneger Toal, Biblionet Groningen, Stichting t Grunneger Bouk en t Regionaal Historisch Centrum Groninger Archieven.
t Was haile dag groot feest in t gebaauw van de Groninger Archieven aan Cascadeplein in Stad mit n keur aan aktiviteiten woarbie t Grunnegs in aal zien geuren en kleuren centraal ston. En t was beslist nait zo dat ter allent mor grieze koppen wazzen. Ook t pootgoud was vertegenwoordigd.
Vanòf d’òftrap van Olaf Vos mit de Bond tegen Harries en kinder mit nije Grunneger kinderlaidjes van cd Kinderspul zat stemmen der goud in.
Veur kinder was der n kinderhörntje mit veurlezen, n spannende digitoale klunderloa en der konnen gehaaimschriften van meester Kriet, Fré Schreiber, ontsieverd worden. Bie t inleveren van d’oplossen kregen kinder n verrazzen: n boukie mit Frekie’s gehaaimschriften.
In Meziekkroug wazzen der wieder optredens van t trio Lianne Abeln, Nettie Vening en Ed Wennink mit gitarist Jan Penninkhof, Jan Henk de Groot & Band, rapformoatsie Wat Aans! en Gert Sennema mit Weskantstad. Gert Sennema was hail bliede mit K. ter Laanpries 2011 van Stichting t Grunneger Bouk dij oetlangd wer deur diptaaierde Piet de Vey Mestdagh. Slotact wer verzörgd deur Hans ten Have mit zien band.
Tussendeur speulde Grunneger Sproak verschaaiden ainakters, woarbie d’vlèzzen van de bar vlogen.
Bezuikers konnen strandjen mit Grunneger schrievers en dichters dij veurlezen oet aigen waark en de bundel ‘Oetzicht’ dij op d’Dag prezentaaierd wer. Elkenain kreeg ‘Oetzicht’ vergees mit noar hoes.
Mìnsen konnen luustern noar verhoalen oet t Westerketier en der wuiren flitslezens geven over t Grunnegs. Specioale aandacht was der veur t belang van t Grunnegs in de zörg in d’lezen van Hilda Schipper-Baptist, dij as humanitair roadsvraauw en geestelk verzörger joarenlange ervoaren het mit t waark in verzörgenstehoezen en mit verstandelk gehandicapten. Jan Sleumer gaf n lezen over streektoalen en streektoalschrievers, Sies Woltjer en Koen Heidema over De Heliand. Siemon Reker prezentaaierde zien bouk ‘Dat dou ik die nait noa, Ede Staal zuzooiend op zondagochtend’ aan Gijs Lensink.
In de broeskurzussen over Grunneger literatuur (Wim Bastiaanse), Grunnegs proaten (Piet Reitsema) en Grunnegs schrieven en spellen (Meike Stedema) konnen mìnsen heur Grunnegs biespiekern. En ale vroagen over t Grunnegs konnen ze kwiet bie meester Kriet.
Op youtube staait n fimpie van Eltje Doddema mit n impressie van de dag: http://www.youtube.com/watch?v=f8kGVosWITw
Meer informoatsie: www.dagvandegrunnegertoal.nl
of bie t Huis van de Groninger Cultuur, Henk Scholte of Ida Nieboer (050-5992060/050-5992061)
e-mail: info@huisvandegroningercultuur.nl
Specioale oetgoave tiedschrift Moi!
Der is weer n biezunder tiedschrift moakt veur de Dag van de Grunneger toal: 'Moi'! Moi is wied verspraaid deur haile pervinzie en lag vanòf ènd feberwoarie vergees bie o.a. boukhandels, bibeltaiken en VVV’s. Moi is ook te downloaden via www.dagvandegrunnegertoal.nl onder d’kop Moi.
Moi staait vol mit vroaggesprekken mit verschaaiden Grunnegers, dij vertellen over heur toal en waark. t Tiedschrift is riekelk opsierd mit foto’s van Jan Glas. Ook t pergram van daarde Dag van de Grunneger toal staait der in, net as informoatsie over allerhand Grunneger instanties.
Lezers van Toal en Taiken, Krödde en Feith hebben Moi toustuurd kregen. Wèl nog n exemploar bestellen wil, kin n mail sturen noar: info@huisvandegroningercultuur.nl Zolaank veurroad strekt.